سمعتوا قصة واحد بالسجوني = يقول ذبح السيف يا ناس هايبه 


يقول افضل بالرصاص اقتلوني= والعين ملفوفاً عليها عصايبه 


لعل بعض الناس مايعرفوني= ودي لو التنفيذ والشمس غايبه 


انتم عرفتم قصتي و رحموني = اخشى على ابوي تلحقه عايبه 


لو يعرف اني مهرب للفيوني = ولو يدري اني للمسلمين جايبه 


ومدمن حشيش ومثقل بالديوني= يدعي على ودعوة العود صايبه 


ولا تخبرون اللي بطبعه حنوني= الوالده اخاف تكثر مصايبه 


اخاف لا درت يصيبها جنوني = وتصبح عليلة عالة على شايبه 


من ضاع عقله ما تفيد العيوني = والعقل من مد الكريم و وهايبه 


واللي جرح قلبي وزود طعوني= وروحي عليه من العام ذايبه 


جماعتي من انسجنت قاطعوني = وكيف الفتي ينسى من اقرب قرايبه 


كله سبايب شلة دهوروني = وصار الثمن راسي وفوقه نصايبه 


حسبي عليهم شلة ضيعوني = والموت حان وقفوا لي ركايبه 


ومشيت في درب السراب مهمومي = وعقول البهايم بين الاكواخ سايبه 


الله يرميهم مثل ما رموني = موت المهونه شلتي هم جلايبه 


ما طعت يوم الطايعين انصحوني = ولا ينصح الانسان الا حبايبه 


يالله وامرك بين كاف ونوني = خلقتني من بين صلبه وترايبه 


عوض على دنياي واحسن اضنوني = واغفر لمن نفسه عن الثرى تايبه 


ياللي حضرتم مقتلي سامحوني = وهذي نهاية قصتي مع سبايبه