اتصل علي وقال.. يا أخي ابستفسر منكم، أنا أعرف إنكم تكافحون المخدرات، والله يقويكم.. لكن أنا عندي بيت ومأجره على عائلة.. ولي ثلاث سنوات ما استلمت حق الإيجار.. ودائماً أطالب المستأجر بالفلوس.. ويكذب علي مرة تطلع علي زوجته وتقول مالي دخل.. مرة يطلع عياله الصغار حتى هم تعلموا الكذب.. جيت مرة ولالقيت المكيفات موجودة.. عرفت إنه مدمن على المخدرات حتى الشغل ما يروحله.. سكت شوي.. وقال.. آه.. يا ناس تكفون لا تتركون عيالنا يضيعون.. والله نسيت حقي.. وانشغلت في موضوع الرجال.. وأنا اللي تبون أسويه له مستعد.. قلت ما قصرت وكثر الله خيرك.. والخير في بلدنا موجود.. لكن الله يعين هالأسرة.. ولازم نوقف معها ومع غيرها.. ويا الله سترك.


الأبرق

فلاش

قالي يارب لك الحمد على العافية.. والله ان حياتي أول حياة بهايم.. لااعرف الرايح ولااللي جاي... ومهمل بيتي وعيالي.. ومخلي الدرعا ترعى..كان همي الوحيد وشلون احصل على جرعة مخدر..كل ماشفت فلوس مع أحد اشوفها مخدرات.. لا.. والمشكلة اني اطالع الناس باستحقار اللي مايتعاطون. وكنت اعتبر اللي مايتعاطى ماهو رجال.. وتصدق مره اني طلعت للشارع بملابسي الداخلية.. والناس تضحك.. ولا أدري وش يضحكهم.. بس هذي المخدرات.. تخلي الواحد يسوي أكثر من كذا.. وكنت أيام التعاطي.. حالتي حالة.. وبصراحة ماكنت أشوف في جسمي إلا لصعارير اللي بالجبهة ولااللي بالراس.. واثر الضربات اللي في الوجه واليدين والرجلين.. وكلها بسبب المخدرات.. اللي تخلي الواحد مايدري عن نفسه.. بس والله إني احمد ربي واشكره اللي أنقذني منها ومن بلاويها.. ويا الله سترك..


الأبرق

فلاش

اتصلت إحدى الأمهات .. وقالت عندي ولدي مسوي لنا إزعاج .. بالبيت .. كل ليلة يجيب شلته الفاسدة.. وسهر وتعاطي حشيش لين الصبح، واللي دمره وكان سبب في طيحته بالمخدرات ولد عمه - حسبي الله عليه - وكل الطرق استخدمناها معه نصحناه وهاوشناه، لكن كل هالامور ما نفعت أبوه وهو ابوه له سنة بالمستشفى ما عمره زاره ولا فكر يزوره، حالتنا حالة ولا صرنا نذوق للحياة طعماً.. كله من هالولد اللي صار عقوبة علينا وجاب لنا المصايب.. فرق شملنا وفضحنا عند جيرانا وقرايبنا ومعارفنا ولعاد يبون لنا طاري.
وخوفا على حياتنا منه نبيكم تشوفون له حل ودخلونه مستشفى الأمل لعله يتعالج ويهديه الله من هالبلاوي .
قلت إيه هذه المخدرات وما تسوي وبعضهم يحسب أنها مرجلة لكن آخرتها ما تسر عدو الله يحمي شبابنا وبلدنا ويا الله سترك.


الأبرق

فلاش

قبل خمس سنين رايحين للعمرة ومعنا خمسين متعافي من إدمان المخدرات، وكلنا راكبين الباص بعد ما أحرمنا ودخلنا الحرم كان معي واحد من المتعافين تعدى عمره الخمسين وكنت أنا معه لأنه توه متوقف عن شرب الخمر وأول ما دخلنا الحرم نزلت دموعه وجلس يصيح وقال للأسف إني وصلت لها السن وما عمري شفت الحرم والكعبة بعيني.. وأول مرة بحياتي أدخل الحرم.. المهم وحنا راجعين وكنت أسولف معه عن حياته وكيف أدمن على الخمر ومن ضمنها قاللي عن موقف يقول هذا الموقف أتوقع ما راح أنساه في حياتي.. قلت وشو الموقف.
قال أمي تدري إني ما أجي للبيت الفجر إلا وأنا سكران، وكانت عندنا بقرة وكالعادة تحط أمي غضارة فيها عشا لي وغضارة فيها نفيع للبقرة جيت مرة للبيت وأنا سكران وتعشيت يوم جاء الظهر وإلا أمي تقومني وراك ما تعشيت قلت إلا تعشيت قالت لا والله البقرة أكلت نفيعها وعشاك باقي.. تذكرت أني ماكل النفيع وتركت عشاي.. اللهم لا تزغ قلوبنا.. ولا حول ولا قوه إلا بالله... نسأل الله له الثبات والتوبه ويالله سترك.


الأبرق

فلاش

اتصل وقال أنا عندي أخوي عسكري واتضح لي أنه يتعاطى حشيش.. أكثر من خمس سنين.. والحقيقة ما كنت أشوفه كل الفترة هذي لأنه بديرة وأنا بديرة. واللي خلاني ادري عنه إنه مدمن حشيش.. لما اتصلت زوجته.. وقلت شوفولنا حل مع أخوكم.. كثرت مشاكله وكل يوم يضرب فيني والناس تطلبه فلوس.. ولا صار يروح للشغل يعني يمكن يفصلونه بأي وقت.. واجلس أنا وعياله نشحذ. الحاصل سألت أحد من أصدقائه وأكد لي الخبر.. وألحين أبيكم تنقلونه لمستشفى الأمل عشان يشوفون وضعه ويعالجونه.. قبل ما تزيد المشاكل.. يا إخوان ما فيه شك أن الحشيش من أكثر المواد المخدرة خطورة لأنها تعتبر من المهلوسات اللي تسبب الإدمان والشكوك والأمراض. ولازم نكون حذرين منها ونحصن عيالنا ضدها.. ويا لله سترك.

الأبرق

فلاش

في ملتقى المتعافين من الإدمان .. مسكني واحد من الحاضرين... وقالي والله إني جيت محد دعاني.. بس عشان أقابل واحد منكم وصارحه.. أني أتعاطى حشيش من ثلطعش سنه .. واحس إني روحتي للمديرية كل بيعرفني وننفضح.. وأنا ياخوك أدور الستر وعندي الرغبة وابغى المساعدة.
ولا تنسى يا فلان إني أبو عايله ... لا ... وجد حتى يوم عرس بنتي والله مدري وش أنا فيه من هالمخدرات... ودي اسألك وش الطريقة.
قلتله .. ابشر بسعدك وأنت تراك مريض وبحاجة العلاج والراحة لمدة شهر.. وبنجيبها لك من المستشفى اللي أنت تبيه... وقل لهلك وجيرانك أنك مسافر... وقتها ندخلك مستشفى الأمل وتعالج وإذا طلعت امسك الجادة الصحيحة .. وابعد عن الشله اللي دهورك كل هالسنين بالمخدرات.. ويالله سترك..


الأبرق

فلاش

يوم الجمعة اللي فاتت بعد صلاة العشاء كنت صدفة بالمكتب.. وكلموني من المقر.. قالوا فيه عائلة عندنا يبونك ضروري.. قلت خلو الرجال يطلعلي.. المهم طلع وقابلته.. وكلمني ومن ضمن كلامه قال حنا نقرا عنكم بالجرايد.. وبنشوف إذا أنتم صادقين وبتفزعون لنا.. عندنا أخوي مدمن ويبي يذبحنا وهدد أمي بالقتل وهددني أنا بعد.. وعلى فكرة هو أصغر مني عمره 23سنة.. ودخل علينا.. وهو رايح فيها.. من هالسموم وتضاربت أنا وياه وقفلت عليه الغرفة وجيتكم طاير.. وأمي تراها معي وتبي تكلمك تحت تبيكم تنقلونه لمستشفى الأمل عشان يتعالج ولا ودها انه يطلع لين يطيب.. قلت له خلاص اكتب هالإقرار وعطني صورة بطاقتك ورقم جوالك وبتلقى بعد نص ساعة الفرقة عندك.. وفي نفس الليلة وحسب ما عرفت أن الأم اتصلت وتدعي ربها يحفظ هالبلد ورجاله ودعت أن الله يبعد المخدرات عن كل مسلم.. ويا الله سترك.


الأبرق

فلاش

اتصلت إحدى الزوجات وقالت: تزوجني قبل أربع سنوات، وأخذني معه للمنطقة اللي يعمل فيها عشان يكون قريبا من عمله.. وبعد فترة بسيطة اكتشفت أنه مدمن.. ويأكل حبوب وبعدين عرفت أنه يتعاطى الحشيش، ويجتمعون هو وربعه في أحد البيوت وكلهم بالهوى سوا.. ووقتها ما كنت أعرف وش أسوي.. وبعد سنتين رزقت منه ببنت.. لكن الحين وبعد أربع سنين بدأ يهلوس ويشك فيني.. حتى كل ما نجي نسافر يجلس يلفلف بالشوارع وإذا سألته ليش تسوي كذا يقول فيه ناس يطاردوني.. وأحياناً إذا كنا مسافرين للديرة.. ما أدري إلا وحنا راجعين لنفس المكان بعد ما نكون قطعنا خمسمية كيلو.. وصار يهمل نفسه ولا عاد يهتم لا فيني ولا في بنته، وبالأخير انفصلت عنه.. لكن والله إني أعزه واحترمه.. وهو إنسان طيب ولا ودي انه يستمر في هالبلاوي.. عشان نفسه وبنيته ووظيفته اللي منقذته.. وابغاكم تعالجونه.

قلتلها: الشخص اللي عطيتيني اسمه عرفته.. وأبشرك دخلوه قبل يومين مجمع الأمل عشان يتعالج.. ونرجو الله أن يعافيه وأمثاله.. ويالله سترك.

الأبرق

فلاش

مريت فندق الأنتر.. والله وأشوف ذيك الزحمة.. وأسأل وش السالفة قالولي.. هذا ملتقى للمتعافين من الإدمان بمناسبة اليوم العالمي لمكافحة المخدرات.. وحاضره اكثر من خمسمية متعافي.. جو.. من مختلف مناطق المملكة يؤكدون توبتهم.. ويوقفون مع العالم كله ضد المخدرات وبلاويها اللي دمرت هالشباب.

والله يوم دريت بالسالفة قلت.. أيه.. ما يحس بالنار الا رجل واطيها.. لأنهم جربوا وذاقوا مرارة هالسموم اللي ضيعتهم كل هالسنين.
بس الله يثبتهم ويحفظ دولتنا.. اللي احتوتهم.. وعالجتهم.. ودعمتهم.. وحريصة على استمرارهم بالتعافي.. وابتعادهم عن آفة المخدرات.. ويالله سترك.

الأبرق